Garaipen haundia lortu zuten Xabat Pastor eta Iker Imaz arraunlari hernaniarrek larunbatean, Donostiarra traineruarekin, Eusko Label Ligan. Bandera irabazi zuten Galizian, Rianxon, segundu erdiko tartearekin nagusituta Santurtziri. Horrela, ezin estuago, denboraldiko aurreneko bandera astindu zuten. Atzo, berriz, laugarren sailkatu ziren Boiron. Bi emaitza horiekin, sailkapen nagusiko laugarren postura igo dira, eta ohorezko txandan ekingo diote datorren asteburuan. Ondarroa, berriz, zazpigarren izan da bi egunetan, Ivan Lopez hernaniarra tartean zela.
ETE Ligan, berriz, denboraldiko zazpigarren bandera lortu zuen Tolosaldeak, larunbatean Ondarroan, Eider Barba eta Enara Villena hernaniarrekin. Hibaikako laukote hernaniarra (Uxue Alberdi, Garazi Arabiotorre, Ihintz Larrañaga eta Jone Pastor) hirugarren izan zen.