Erakusketa «berritzaile bezain interesgarria» jarri du Hernani Errotzenek, Biteri kultur etxean; eta gaurtik egongo da zabalik, abuztuaren 27ra arte: 1620 Loraldia, nafar errenazimenduari buruzkoa. Astelehenetik ostiralera izango da aukera erakusketa bisitatzeko, goizez zein arratsaldez: 09:00etatik 14:00etara, eta 16:30etatik 20:00etara.
«Denetan loriatsu eta oparoena izan arren, Nafarroako estatu independentearen azken mendea da gure artean ezezagunena», nabarmendu du Hernani Errotzenek. Garai horri egiten dio erreferentzia erakusketak, hain zuzen ere: «Europan ematen ari zen Errenazimenduaren aroari begiratzen zion estatu garaikidea zen Nafarroa, beldurrik gabe aurrera egiten zuena, bere eskubideez kontziente eta harro, berezko hizkuntzaz lotsarik gabe hitz egiten ziona munduari». Hernani Errotzenek azpimarratu nahi izan du, «sendotasun eta sen haundiko erakunde eta agintari politikoek» gidatu zutela Nafarroako estatu independente hura, eta bere «garai aurreratuenetarikoa» izan zela, politikoki, kulturalki eta sozialki, «harik eta Luis II Nafarroakoak eta Luis XIII Frantziakoak bi estatuak bateratzea erabaki zuten arte».
Panel edo posterren bitartez egin diote errepasoa garai horri, erakusketan. Aritz Ibarrarenak dira paneletako irudiak, eta Nabarraldek osatu ditu testuak. 24 panel dira guztira, euskeraz; eta gaztelaniazko eta frantsesezko laburpen bana dute alboan.
«Bisitatu, interesgarria izango da eta», animatu dute.