Hasi dira Zikuñaga Papelera txapelketako semifinalak, eta atzo, lau hernaniarrek lortu zuten finalera sailkatzea, dagoeneko. 18-2 irabazi zuten Xabier Apaolazak eta Anartz Oiartzabalek, jubenilen lehenengo mailan, Tolosako Iraetaren eta Intxurreko Uzkudunen kontra. Irabazi egin zuen Jon Jarak ere, Barañaingo Kañamaresekin, Txarutako Lakostaren eta Apeztegiaren kontra (18-14), jubenilen bigarren mailan. Eta hernaniarren arteko lehian, kadeteen lehenengo mailan, Julen Deskarga nagusitu zen, Lapkeko Erauskinekin, Unax Manterolaren eta Intzako Urdanpilletaren kontra (18-17).
Beste bi hernaniarrek izango dute finalerako pasea lortzeko aukera, gaur: Josu Altunak eta Mikel Lasak jokatuko dute, nagusien bigarren mailan, Intxurreko Zabalaren eta Larraungo Galarzaren kontra. Kiroldegian izango da, 10:00etan hasita.
Eta bihar, azkenik, bailarako beste lau pelotari ariko dira semifinaletan. Kadeteen bigarren mailan, Xuban Iturbe hernaniarrak eta Xuban Goñi astigartarrak jokatuko dute, 18:00etan, Añorgako Arrutiren eta Zazpi Iturriko Plazaolaren kontra. Eta segidan, kadeteen lehenengo mailakoa jokatuko dute Manex Martin eta Oier Alegria hernaniarrek, Oiarpeko Leoneten eta Mitxelenaren kontra.