Azken txanpan sartu da Zikuñaga Papelera Txapelketa, eta final laurdenetan 58 partidu jokatu ondoren, gaur hasiko dira semifinalak: 12 partidu, sei kategoria ezberdinetan banatuta.
Eta horietan, ordezkaritza zabala izango du Urumea bailarak. Izan ere, bertako 11 esku pelotari ariko dira, asteazkenean beste lau sailkatu ondoren: Xuban Iturbe hernaniarra eta Xuban Goñi astigartarra kadeteen bigarren mailan; eta Xabier Apaolaza eta Anartz Oiartzabal jubenilen lehenengo mailan.
Aurretik, dagoeneko sailkatuta zeuden beste zazpi hernaniar. Kadeteen lehenengo mailan, semifinaletan ariko dira Manex Martin eta Oier Alegria; Unax Manterola, Intzako Urdanpilletarekin; eta Julen Deskarga, Lapkeko Erauskinekin. Jubenilen bigarren mailan, Jon Jara ariko da, Barañaingo Kañamaresekin batera. Eta nagusien bigarren mailan, finalerako pasea bilatuko dute Josu Altuna eta Mikel Lasa hernaniarrek.
Gaur jokatuko dira aurreneko semifinalak, Hernaniko kiroldegiko frontoian; baina horietan ez da ariko bailarako esku pelotaririk. Larunbat goizean (11:00) jokatuko dute Jarak, Apaolazak eta Oiartzabalek; eta arratsaldean (16:30) Manterolak eta Deskargak. Igandean (10:00) ariko dira Altuna eta Lasa; eta astelehenean (18:00) Iturbe eta Goñi, eta Martin eta Alegria.