Su hartu du Plaza Berri azpiko koadro elektrikoak, goizeko 11:15ak aldera; eta horren ondorioz, argirik gabe daude Kaxkoko etxebizitza, komertzio eta taberna gehienak, ordutik. Hernaniko Udalak jakinarazi duenez, arratsaldeko 17:00ak aldera konponduta egotea espero dute.
Suhiltzaileak bertaratu dira, eta lortu dute sua itzaltzea. Une honetan, Iberdrolak argindarra guztiz mozteko zain daude, sutearen kausak eta eragindako kalteak aztertzeko, eta konponbidea emateko.
Gertaerak ikusmina sortu du herritarren artean, eta asko bildu dira Plaza Berri inguruan, suhiltzaileen lana bertatik bertara ikusteko.