Atzo hasi zen Donosti Cup nazioarteko futbol txapelketa, munduko txoko askotatik etorritako makina bat talderekin. Eta horien artean izango dira Urumea bailarako taldeak, beste behin. 11 talde izango dira bailararen ordezkari: Mundarroren sei talde, eta Hernaniren bost. Mutilen taldeak izango dira denak, 10 eta 15 urte bitartekoak.
Ligaxkarekin hasi dute txapelketa talde guztiek, lau taldeko multzoetan. Horrela, hiru partidu jokatuko ditu bakoitzak. Atzo izan zuten aurrenekoa, eta gaur eta bihar jokatuko dituzte beste biak. Lortutako emaitzen arabera, kanporaketetara egingo dute aurrera, txapeldun izateko fasea jokatzeko, edo kontsolaziokoan aritzeko. Horiek, ostegunean hasiko dira.
11, 14 eta 15 urteko mutiletan, talde bana izango dute Hernanik eta Mundarrok. 13 urtekoetan, berriz, bi talderekin ariko da Hernanin, eta talde bat izango du Mundarrok. Eta aldiz, 10 urtekoetan, bi talderekin eman du izena talde astigartarrak.
Egun hauetan izango dituzten kontrarioen artean, Kataluniako, Madrilgo edota Frantziako taldeak daude, eta baita gipuzkoarrak ere. Kontrario guztietan urrutienekoa eta deigarriena, 11 urteko mutil hernaniarren taldeak izango du aurrean: Wakatake talde japoniarraren kontra ariko dira, bihar arratsaldeko 18:00etan hasita, Donostiako Berio zelaian.
Baina bailarako taldeak ez ezik, bailarako futbol zelai bat ere izango da protagonista, egun hauetan: Zubipen jokatuko dira makina bat partidu. Atzo, gaur eta bihar, 14 partidu izango dira egunero, goizeko 10:00etan hasi eta iluntzeko 21:00ak arte. Ostegunean eta ostiralean ere izango dira partiduak, 09:00etatik aurrera: final hamaseirenak, final zortzirenak, final laurdenak eta semifinalak jokatuko dira bertan, kategoria ezberdinetan.
Zubipen jokatuko ditu Mundarroren talde batek ere (10 urteko mutilenak), ligaxkako azkeneko biak, gaur eta bihar.
15 urteko mutilak 14 urteko mutilak
|