Hitzordu berezia jarri du Kantuz abesbatzak, gaur eguerdirako. Kontzertua eskainiko du San Joan Bataiatzailea parroki elizan, 13:00etan hasita, motibo berezi batekin: bertan gogoratu eta omenduko ditu, Covid-19aren biktima guztiak. Abesbatzak berak jakinarazi duenez, omenaldia egingo diete «Covid-19aren ondorioz utzi gaituztenei, eta baita gaixotasuna igaro eta aurrera egin dutenei ere».
Horretarako, berezia prestatu dute kontzertuaren egitaraua ere. Zazpi pieza eskainiko dituzte guztira, izen haundiko bost konponsitorerenak: Gabriel Fauré, Henry Purcell, Karl Jenkins, Charles Gounod eta Wolfgang Amadeus Mozart.
«Oroitu eta omenduko ditugu Covid-19aren ondorioz utzi gaituztenak, eta gaixotasuna igaro eta aurrera egin dutenak»
Fauréren pieza batekin emango diote hasiera emanaldiari: Cantique de Jean Racine. Purcellen Funeral Queen Mary: 6. Thou knowest Lord kantatuko dute ondoren, eta segidan, Jenkinsen pieza bat ekarriko dute elizara: Agnus Dei (The Armed Man). Horren ondotik, Gounoden La septième Parole du Christ sur la Croix eskainiko dute, eta Mozarten pieza batekin emango diote segida: Ave Verum Corpus. Jenkinsen eta Mozarten beste bi piezarekin bukatuko dute emanaldia: Jenkinsen God shall wipe (Better is peace-The Armed Man) izango da aurrenekoa, eta Mozarten Confutatis-Lacrimosa (Requiem) piezak itxiko du emanaldi berezia.