Ibilian ibilian, etxerako bidean udako kanpainaren barruan, solasaldia antolatu du Hernaniko Sarek, gaur arratsalderako. Milagrosan izango da, 18:00etan hasita; eta bertan egongo dira Iñaxio Oiartzabal Sareko kidea eta Aiert Larrarte abokatua.
Hainbat gairi helduko diete bi hizlariek, biharko saioan. Besteak beste, honakoak landuko dituzte solasaldian: egungo preso politikoen egoera, gradu aldaketen garrantzia, eta etorkizuneko erronkak.
Gainera, preso ohi batzuk ere gonbidatu dituzte saiora, «beraien testigantza aurreneko pertsonan jasotzeko asmoz», Sarek jakinarazi duenez.
Eta hernaniar guztiei luzatu diete gonbitea, Milagrosara gerturatu eta solasaldian parte hartzeko; eta horrekin batera, baita «presoen etxerako bidean aktibo izateko» ere.