Asteburu honetan bukatuko dute denboraldia, bailarako futbol talde gehienek, oso erronka ezberdinekin: batzuk mailari eusteko borrokan ari diren bitartean, txapeldun izateko jokatuko dute beste batzuek.
Bereziki zaila da egoera Hernanirentzat, Euskal Ligan. Berdeek egun borobila behar dute, mailari eutsi ahal izateko. Pauldarrak taldearen kontra jokatuko dute ligako azkenekoa gaur, arratsaldeko 18:00etan Zubipen; eta bigarren sailkatua mendean hartzeak ez die ziurtatuko Euskal Ligan jarraitzea: beste partiduen emaitzen zain geratu beharko dute. Hernanik irabaziz gero, mailari eutsiko dio Goierri Gorrik galduta; edo Aurrera de Vitoriak galdu edo berdinduta. Berdinketa ere nahikoa izan dezake talde berdeak, beste bi emaitza hauek emanez gero: Aurrera de Vitoriak galtzea, eta Oiartzunek ez irabaztea.
Ordu berean jokatuko dute talde guztiek: etxean ariko dira Goierri Gorri eta Aurrera de Vitoria, dagoeneko maila galdu duten Barakaldo eta Sestaoren kontra; eta kanpoan jokatuko du Oiartzunek, Lakuaren zelaian.
Erregionalen 1go mailako finala etxean, Mundarrok
Bestelakoa izango da Mundarroren lehia, mutil erregionalen lehenengo mailan: ligako txapeldun izateko finala jokatuko du gaur. Zarkumendegin ariko da gainera, 18:00etan hasita.
Txapeldun izan eta igoera lortzeko lehia horretatik kanpo geratu ziren Hernani eta Mundarro, joan den asteburuan, erregionalen ohorezko mailan eta preferenteetan. Hernanik hirugarren posturako lehia izango du gaur, eguerdiko 12:00etan Zubipen, Añorgaren kontra. Irabaziz gero, oraindik izan lezake aukeraren bat talde berdeak, hirugarren mailara igoera lortzeko. Mundarro, berriz, bosgarren izateko lehian murgilduko da, eta Tolosaren kontra jokatuko du, Zarkumendegin, 16:00etan hasita. Irabaziz gero, bosgarren izateko partidua jokatuko luke datorren astean; eta galduta, aldiz, zazpigarren postua izango luke jokoan.
Eta azkenik, Bilbon jokatuko du Hernanik, mutil jubenilen Liga Nazionaleko azkeneko partidua. Deusturen kontra ariko da, gaur 16:00etan, denboraldia ondo bukatzeko.