Herri arteko txapelketa jokatuko dute pelotari hernaniarrek gaur arratsaldean, Azpeitian

Gaur arratsaldeko 18:30etan,  Azpeitian final laurdenetako itzulerako kanporaketa jokatuko dute pelotari hernaniarrek, Azpeitiko pelotarien aurka. Eta Hernaniko pelota elkartekoek jakinarazi dute hainbat pelotari ukituta daudela eta horrez gain, titular bat lesionatuta dagoela. 

Josu Oiaga entrenatzaileak Hernanin jokatu zuten bikote bera jarriko du kadete mailan, hau da, Unax Manterola eta Oier Alegriak, Odriozola eta Egiguren izango dituzte aurkari, eta ezustekoa ematen saiatuko dira hernaniarrak. Jubeniletan, Unai Etxarri eta Anartz Oiartzabal atzelariak zalantzan dira, «biak eskuak ukituta baitituzte, eta bietako batek ez badu jokatzen, Unax Uitzi eta Xabier Apaolazak jokatuko dute, Egiguren eta Labakaren aurka. 

Seniorrak aldiz, egoera okerrago batean daude, izan ere, Markel Lizeaga atzelari titularra lesionatuta dago eta Mikel Lasa beste atzelariak eskuak ukituta izan arrean, «jokatzeko moduan dago». Aurrean Paul Ojuel ere zalantzan, eta jokatzerik ez badu, Xabier Salaberria sartuko da bere ordez, Alberdi eta Larrañagaren aurka.

Bihar, Astigartarrek, eskuz, Tolosaren aurka jokatuko dute, 11:00etan hasita, Amezketan. Eta palistak berriz, etxean ariko dira, goizeko 10:00etan hasita.