Emakumeen Osasunaren Nazioarteko Eguna da datorren ostirala, maiatzaren 28a; eta horren harira, pobrezia menstrualaren aurkako kanpaina jarri dute martxan, Gipuzkoako emakumeen hainbat elkartek (INME, Divinas Nigerianas, Haurralde, Eskuak Salbatzen, Malen Etxea eta Txingudi), Elkarrekin Podemosen laguntzarekin.
Hilekoaren higienerako produktuen bilketa egingo dute, Gipuzkoa osoko hainbat Todo Todo supermerkatutan eta zenbait farmaziatan; eta Hernanin ere izango da laguntzeko aukera: asteazkenetik ostiralera egongo dira, herriko Todo Todo supermerkatuan, arratsaldeko 17:00etatik 20:00etara.
Bertan, jasoko dituzte konpresak, tanpoiak, toalla hezeak eta kopa menstrualak, bazterkeria arriskuan dauden emakumeentzat; eta baita pixoihalak ere, haurrentzat.
«Luxuzko produktutzat hartzen dira, pobrezia eta pandemia egoeretan»
Ohartarazi dute, egoera ekonomiko zailenetan, saihesten den aurreneko gastuetako bat izan ohi dela hori: «hilekoaren higienerako produktuak, luxuzko produktutzat hartzen dira pobrezia eta pandemia garaian; eta gainera, ez dira donazioetan jasotzen, eta ez dute laguntzarik izaten. Horregatik, eskatu nahi dugu oso zerga-karga murriztua izan dezatela». Eta honakoa gaineratu dute bilketaren antolatzaileek: «eskatzen dugu emakumeak ez zergapetzea, emakume izate hutsagatik».
Herritar guztiei eskatu diete laguntza, pobrezia menstrualaren kontra egiteko, produktuak emanez, ingurukoen artean mezua zabalduz eta sare sozialetan aditzera emanez. Eta laguntza eskatu diete, era berean, bilketa horietan parte hartzeko. Asteazken, ostegun edo ostiral arratsaldean Todo Todon egoteko prest dagoenari, eskertuko diote horretan laguntzea. Hernanin, Elkarrekin Podemos talde politikoa ari da hori koordinatzen, eta lagundu nahi duena, haiekin jarri daiteke harremanetan: «zuen kolaborazioa espero dugu, naturala bezain ikusezina den gai honetan», diote.