Joan den urtean bete zituen 50 urte, Langile ikastolak; eta egitarau potoloa prestatu bazuten ere, ezin izan zuten nahi bezala ospatu, pandemia tarteko. Horregatik, aurten ekin diete ospakizun jarduerei berriro, eta erakusketa jarri ondoren, 50garren urteurreneko dokumentala eskainiko dute orain: Ereindako hazia, Langile 50 urte.
Ekainaren hasieran eskainiko dute, lau emanalditan; zehazki, hilaren aurreneko asteazken eta ostegunetan: ekainaren 2an, 3an, 9an eta 10ean, denetan arratsaldeko 19:30etatik aurrera, Biteri kultur etxean.
Gonbidapenak, maiatzaren 24tik 27ra Biterin
Dokumentala ikusi nahi duenak, hori bai, gonbidapena eskuratu beharko du aldez aurretik. Horiek eskuragarri izango dira maiatzaren 24an, 25ean, 26an eta 27an, 18:00etatik 20:00etara, Biteriko harreran.
Gainera, aditzera eman dute dokumentala erosteko aukera izango dela, lau emanaldietako bakoitzaren bukaeran.