Hernaniko Udaleko talde sozialistak ziurtatu duenez, premiazkoa da Karabel auzoan aparkatzeko eskaerei erantzutea; izan ere, diote auzotarrek, lanetik itzultzen direnean, arazoak dituztela aparkatzeko, auzoan aparkatzerik ez dagoelako. «Zonalde honetako bizilagunek pairatzen duten arazo larrietako bat da, eta mugikortasun eta aparkaleku hobearen alde egiten dugun apustua garrantzitsua da, bereziki Karabel bezalako zonaldeetan, jendeak zailtasunak izaten dituelako aparkaleku libre bat topatzeko».
Alderdi sozialistak azaldu duenez, PSE-EEk bileretara eta batzordeetara eraman du arazo hori. Karabelera ez ezik, proposamena beste hainbat auzotara ere zabaltzea nahi du; besteak beste, Lizeagara, Elizatxora edo Antziolara.
Hiru proposamen egin dituzte
PSE-EEk hiru ekimen aurkeztu zituen eztabaidatzeko, eta teknikoki bideragarriak izango balira, beste onura batzuen artean, 138 eta 256 aparkaleku sortzea ahalbidetuko lukete. «Horrek behin betiko irtenbidea emango lieke auzoko bizilagunei eta udalerri osoari, aparkatzeko tokirik ez izateari erantzunez».
Lehenengo proposamena altueran aparkaleku bat egitea da egungo disuasio-aparkalekuan. «118 plaza berri sortzeko, altuera bakarreko eraikin batean; baina gehiago eraikitzeko aukerarekin, beharra ikusiz gero. Beraz, 236 plaza sor litezke bigarren solairu bat eraikiz gero».
Bigarren proposamena zonalde egoiliarra seinaleztatzea da, «auzoko bizilagunek etxera itzultzen direnean aparkatzeko leku bat izan dezaten». Eta, azkenik, hirugarren proposamena da Olaeta plazako espaloia kentzea, geltoki berriaren parekoa. «Espaloi honek ez du zerbitzurik ematen eta baterian aparkatzea eragozten du».