Uztailaren 1etik 23ra antolatu ditu udalekuak, Hernaniko Udalak; eta horietan lan egiteko, begiraleen lan poltsa osatzen ari da. Horretarako, zabalik dago izena emateko epea, hautaketa prozesuan parte hartzeko. Ekainaren 7ra arte apuntatu daiteke. Internet bidez egin daiteke, hernani.eus webgunean; edo udaletxean, beheko solairuan, Arreta eta Erregistroko bulegoan: astelehenetik ostiralera, 08:00etatik 14:00etara; eta astearte eta ostegunetan arratsaldez ere bai, 14:30etatik 19:00etara. Horretarako, hitzordua hartu behar da, aldez aurretik.
Uztaileko udalekuak egunero izango dira astean zehar, astelehenetik ostiralera, goizeko 09:30etatik 13:30etara. 3-10 urteko haurrentzat izango dira, eta helburua da, «haurrekin eta haurrentzat aisialdi hezitzailea eta erakargarria eskaintzea, euskeraren erabilera eta genero parekidetasuna ardatz dituen programazio baten bidez». Hori horrela, programazio hori sortu eta gauzatzea izango da begiraleen egitekoa.