Oraingoan bai, txapela jantzi du Xabier Arizkorreta Garcia hernaniarrak, pala egokituko Laboral Kutxa Masterrean. Igandean jokatu zuen finala, Getarian, Eneko Sagarmendi mutrikuarrarekin batera; eta 25-20 nagusitu ziren Mindara Elkarteko pelotariak, Iraitz Huegun eta Jurdan Arakistainen kontra.
Borrokatua eta luzea izan zen partidua. Hasieratik hartu zuten aldea Arizkorretak eta Sagarmendik, baina ez zuten amore eman kontrarioek ere, eta 20-19 gerturatu ziren markagailuan. Azkeneko tantoetan egin zieten ihes berriro, txapela janzteko.
Joan den urtean jokatu zuen txapelketa aurrenekoz, Xabier Arizkorretak; eta orduan oso gertu izan zuen txapela: azpitxapeldun izan zen, finala galduta. Bere bigarren partehartzean izan da txapeldun hernaniarra.