Antzerki saio berezia antolatu du, gaur arratsalderako, Hernaniko Udaleko Berdintasun Sailak: Lurrun minez antzezlana eskainiko dute, 19:00etan hasita. Doakoa izango da, baina emanaldiaz gozatzeko, sarrera eskuratu beharko da aldez aurretik: Kulturarteko Plaza Feministan (Florida 28), edota emailez idatzita, berdintasuna@hernani.eus helbide elektronikora.
«Hiru mariken arteko drama psikologikoa, soziala eta sexuala da Lurrun minez; hiruki arrosa. Gay sauna batean gertatuko da ezusteko topaketa. Lurrun artean nahastuko dira desioak, jaia, frustrazioak, erakarpen sexualak, boterea eta beste hamaika kontu labainkor», aurreratu dutenez. Saunan egiten du lan Alexek (30 urte); gizonezkoen sexu trukerako espazioetan ohiko bisitaria da Oskar (44 urte); eta aurrenekoz joango da gay sauna batera Jesus (19 urte). Gabon gauez gertatuko da. Saunak itxita egon beharko lukeen arren, irekitzea erabaki du Alexek, opari ederren bat jasotzeko esperantzaz. Drama psikologiko, sozial eta sexuala da antzezlana, eta plantetuko ditu galdera asko hausnarketarako gaiak.
Galder Perezen testua da antzezlanaren oinarri, eta Olatz Gorrotxategik zuzendu du. Taula gainean izango dira Gaizka Chamizo, Jon Koldo Vazquez eta Pelayo Serrano aktoreak, Joseba B. Lenoirren musikarekin.