18garren edizioa izango du aurtengoa Laburbirak, euskerazko film laburren zirkuituak. Dobera Euskara Elkarteak antolatuta, Biterin izango da, gaur arratsaldean bertan: zortzi film labur eskainiko dituzte, 18:30etan hasita, eta doakoa da sarrera.
Honakoak dira zortzi filmak: Aterpean ateri (Ruben Cresporena), Nigandik (Imanol G. Gurrutxaga), Game over (Ilune Diaz Pollacino), Ilunabarrean esan (Xavier Vallina), Babarrun txapelketa (Andoni Martinez de Medina eta Julen de la Serna), Datsegit (Aitor Arruti), Nire eguneroko maitea (Eñaut Castagnet, Manex Fuchs eta Ximun Fuchs), eta Agur (Iñigo Acha Gómez).
Guztira, 72 minutuko emanaldia izango da, eta bukatzean, solasaldia ere egingo dute. Horretarako, bertan egongo dira, film horietako baten egileak: Eñaut Castagnet, Manex Fuchs eta Ximun Fuchs.
Baxenafarrak dira Fuchs anaiak, Larzabalekoak: aktorea Manex, eta zinegile eta antzerkigilea Ximun. Miarritzekoa da, aldiz, Castagnet, zuzendaria eta muntatzailea. Le Petit Theatre de Pain antzerki taldeko kideak dira hirurak, eta elkarrekin aritu ziren Non filmean, Castagnet eta Ximun Fuchs zuzendari zirela, eta bi anaiak aktore. 2017an estreinatu zuten hura, Donostiako Zinemaldian: Frantziako herri txiki batean, enpresa bat itxiko dute, greba gogor baten ondoren.