Auzolanerako deiari hutsik egin gabe, Portuko makina bat auzotar elkartu ziren duela bi asteburu, lanerako tresnak eskuan hartuta: atxurrak, eskuareak, motozerrak, kimatzeko guraizeak... 30 auzotar inguru bildu ziren, Portu erreka garbitzeko asmoz, goizeko zortzietan jarri zuten zitari erantzunez. Eta horretan aritu ziren goiz osoan, erreka txukun-txukun uzteko lanetan. Bazterretan eta uretan zeuden zakarrak kendu, ertzetako landare eta zuhaixka luzeak moztu... Emaitzarekin oso pozik azaldu da Portuko Auzo Elkartea, eta eskerrak eman nahi izan dizkie bertaratu eta parte hartu zuten guztiei, egindako esfortzuagatik eta erakutsitako jarreragatik.