Ekainean ere, uretako jarduerak izango dira Hernaniko kiroldegian, haur eta gazteentzat. Arratsaldeetan eskolarik ez dutela eta, eskaintza berezia prestatu dute, eta bost taldetan banatuta, 5 eta 16 urte bitartekoentzat ikastaroak antolatu dituzte, ekainaren 1etik 22ra.
Eta horietan izena emateko, gaur zabalduko dute epea: internet bidez egin daiteke, web.hernani.eus/kirola webgunean; edo bulegoan bestela, aldez aurretik hitzordua hartuta telefonoz (943 55 21 85). Maiatzaren 17ra arte dago aukera.
5 urtekoen eta 6 urtekoen taldeek, egunero izango dituzte saioak, arratsaldeko 15:00etatik 15:45etara. 7-8 urtekoek, berriz, astelehen, asteazken eta ostiraletan izango dute ikastaroa, 15:10etatik 16:00etara. 9-12 urtekoen taldea astearte eta ostegunetan elkartuko da, 15:10etatik 16:00etara. Eta 13-16 urtekoenak, azkenik, astelehen, asteazken eta ostiraletan izango du ikastaroa, 16:00etatik 16:50etara.
Plazak baino jende gehiago apuntatuz gero, maiatzaren 18an egingo dute zozketa, goizeko 08:00etan; eta egun horretan bertan argitaratuko dituzte zerrendak, eguerdiko 14:00etan.
Aldiz, ikastaroa emateko behar adina jende ez balego, taldeak elkartu egingo lituzkete: 5 eta 6 urtekoek elkarrekin egingo lukete ikastaroa, eta baita 7-8 eta 9-12 urtekoek ere.
Adinaren eta saio kopuruaren araberakoa da prezioa, eta kiroldegiko bazkideek deskontua izango dute.