Astearte arratsaldean banatu zituzten CAF-Elhuyar sariak, Donostiako Tabakaleran, Ezagutza da txertoa lelopean; eta hernaniar baten eskuetara iritsi da, horietako bat: Iñaki Sanz-Azkuek jaso du zientzia-kazetaritzaren arloko saria, Etxeko leihoak naturaren behatoki erreportajearekin. Naiz egunkariko Gaur8 atalean argitaratu zuen artikulua, biologo eta irakasle hernaniarrak.
Joan den urteko martxoan idatzi zuen erreportajea, konfinamendu garai bete-betean. «Gaurkotasun beteko artikulu bat da, baina aldi berean, egilearen ikuspegi pertsonala azaltzen du, behaketan eta kontenplazioan oinarritua, eta horrek originaltasuna ematen dio», azaldu dute epaimahaikideek.
Horrela, bigarrenez jaso du CAF-Elhuyar saria Sanz-Azkuek, eta «oso pozik eta sorpresaz» hartu du, Kronikari azaldu dionez. «Egin ditudan beste erreportajeen aldean, desberdina da hau. Badauka ikuspuntu zientifikoa, zientziari lotutako kontuak aipatzen ditudalako; baina baita hausnarketa puntu bat ere, nire ahotsetik idazten dudana. Horregatik, ez nuen espero saria jasotzea. Eta kontrakoa gertatu da, originaltasun horixe saritu dute».
Saria jasotzeak, «eta nire lana baloratzen dela ikusteak», bizipoza ematen diola nabarmendu du hernaniarrak.
Errekonozimendu horrekin batera, 2.000 euroko saria eta Imanol Andonegi Mendizabalen eskultura bana jaso zuten, astearteko lau sarituek. Nahia Seijas Garzónek jaso du dibulgazio artikulu orokorraren saria; Ainara Sangroniz Agudo izan da saritua egilearen doktore tesian oinarritutako dibulgazio artikuluen atalean; eta Asier Alvite Arreguirentzat izan da lehen sektoreko lanak saritzeko Neiker Sari Berezia.
Horiez gain, Elhuyarren Merezimendu Saria ere eman zuten, eta oraingoan, Jabier Agirre Lasarte medikuak jaso du aitortza, euskalgintzan egindako ibilbide luzeagatik, eta euskeraren normalizazioan eta zientziaren dibulgazioan egindako lanagatik.