Euskerazko film laburren zirkuituak 18garren edizioa beteko du aurten. Hori horrela, euskal ikus-entzunezkoen harrobitik 8 film labur Euskal Herriko hainbat aretotara eramango ditu apirilaren 26tik maiatzaren 30era bitartean. Ordiziako Herri Antzokian emango zaio hasiera eta Larrabetzun amaituko da; tartean, Bizkaiko, Gipuzkoako, Arabako eta Nafarroako hainbat herritatik igaroko da. Hernanin ere izango da horretarako aukera, maiatzaren 19an, Biterin, arratsaldeko 19:00etan.
Hainbat generotako laburmetraiak ikusgai
Laburbira XVIIIgarren edizioa osatzen dute 2019-2020an grabatutako eta ekoiztutako euskerazko 8 film laburrek. «Emanaldiak irauten duen 72 minututan ikusleak gorrotoa, barrea, beldurra, jakin mina eta nazka bizitzeko aukera izango du», aurreratu dute antolatzaileek.
Horrez gain, jasotako film labur guztien artean 8 aukeratu dira «beraien istorio eta kalitate nabarmenagatik eta jaialdietan izandako harreragatik». Hauetariko batzuk Zinebi (Nigandik) eta Mendifilm Festival (Aterpean Ateri) jaialdietan aurkeztutako lanak izan dira; eta beste batzuk, berriz, laburmetraia lehiaketetan sarituak ere izan dira: HUHEZINEMA (Babarrun Txapelketa) eta Kameratoia (Agur).
Aurten, esan bezala, 8 ikus-entzunezko ikusteko aukera izango da: Aterpean atari (Ruben Crespo); Nigandik (Imanol G. Gurrutxaga); Game Over (Ilune Diaz); Ilunabarrean esan (Ekhiñe Aizkorbe, Sara Alonso, Irati Egibar, Julene Etxauri, Xabier Villanina eta Irene Zaldua); Babarrun txapelketa (Andoni Mtz de Madina eta Julen de la Serna); Datsegit (Aitor Arruti); Nire eguneroko maitea (Ximun Fuchs, Manex Fuchs, Eñaut Castagnet); Agur (Iñigo Acha).