Gaur bukatuko dute aurreneko fasea, Hernaniko mutil seniorrek, Gipuzkoako bigarren mailan. Bergaran jokatuko dute, Labegaraieta kiroldegian, arratsaldeko 15:30etan hasita.
Aspaldiko partez, mutil seniorren taldea izan du Hernanik aurten, eta estreinako denboraldian, maila onean ari dira hernaniarrak. Oraingoz, bere multzoko bigarren postuan daude, bost punturekin; eta aukera daukate, Urola Aranzadi liderrarekin berdintzeko, haiek Sima Corazonistas taldearen kontra galduz gero. Edonola ere, ondo bukatu nahi dute ligaxka hernaniarrek, joan den astean garaipen haundia lortu ondoren: Urola Aranzadi bera hartu zuten mendean, etxean.
Neska jubenilek, aldiz, liga bukatu ez, hasi egingo dute asteburu honetan. Bihar ekingo diote, eta Hernaniko kiroldegian jokatuko dute estreinako partidua, eguerdiko 12:00etan. Arrasate izango dute aurrean.
Hiru multzotan banatu dituzte taldeak, neska jubenilen Gipuzkoako Txapelketan; eta bigarrenean ariko da Hernani, beste bost talderekin: Arrasate bera, Ordizia, Tolosa, Jauja eta Urnieta. Bost jardunaldi aurreikusi dituzte guztira, eta beraz, behin jokatuko dute talde bakoitzaren kontra: hiru partidu etxean, eta bi kanpoan.