Hiru hitzordu izango dituzte Hernaniko arraunlariek, asteburu honetan. Batetik, Gipuzkoako Batel Ligan, bi estropada izango dituzte. Pasaian ariko dira gaur, goizeko 10:30etan hasita; eta Hernaniko lau batel ariko dira: mutil infantilena, neska promesen bi batel, eta mutil kadeteena. Bihar, berriz, Donostian daukate hitzordua, Urumea ibaian, 09:30etan hasita. Haur eta kadeteentzat bakarrik izango da hori, eta beste lau batelekin ariko da Hernani: neska haurrena, neska promesen bi batelak, eta mutil kadeteena.
Bihar bertan, bestalde, Oriaren Traineru Jaitsiera jokatuko da Orion, 09:00etan hasita. Hernaniko trainerurik ez da izango bertan, baina klubeko hainbat arraunlarik hartuko dute parte: neska batzuk Lapurdirekin ariko dira, eta mutil batzuk, berriz, Donostiarrarekin. 30 traineru ariko dira guztira.