Gipuzkoako Txapelketan, ligaxka bukatuta zeukaten jubenil mailako neskek; baina partidu bat jokatzea falta zuten Joana Tolaretxipi eta Alaitz Barrenetxea hernaniarrek, Covid-19aren eraginez atzeratu zena. Ostegun arratsaldean jokatu zuten hori, Alegian; eta 30-25 nagusitu ziren hernaniarrak, Intxurre 2 taldearen kontra. Horrekin, semifinala jokatzeko txartela lortu dute, ligaxkako bigarren postuan sailkatuta.
Datorren asteburuan jokatuko dituzte Gipuzkoako Txapelketaren semifinalak, seguruenik Hernanin, martxoaren 28an. Horietan ariko dira Tolaretxipi eta Barrenetxea, eta baita Ekiñe Balerdi eta Eider Otaegi ere, nagusien bigarren mailan.
Gainera, hiru bikote hernaniar daude sailkatuta finaletara, dagoeneko: Amaia Irazustabarrena eta Ariane Arrieta, nagusien lehenengo mailan; Eli Gutierrez eta Ainhoa Urien, nagusien bigarren mailan; eta Ane Kerejeta eta Enara Macicior, jubeniletan. Semifinalak irabaziz gero, hiru finaletatik bitan aritu daitezke bi bikote hernaniar, elkarren kontra.