Pasa den asteburuan futbola itzuli zen Zarkumendegira. Mundarroko taldeek lehiaketari ekin zioten, berriro ere, eta makina bat norgehiagoka izan ziren Astigarragan. Horrez gain, oraindik zelaira itzuli ez ziren Hernaniko taldeak ere txapelketara bueltatu ziren. Hori horrela, partiduz jositako asteburua izan zen aurrekoa.
Emaitzei dagokienez, Mundarroko taldeetan berdinketak izan ziren nagusi, jokatutako zazpi norgehiagokatan lau berdinketa izan baitziren. Hala ere, garaipeneko hiru puntuak lortu zituen talderen bat ere izan zen; Gizonezkoen Gorengoen Mailak 1-0 irabazi zuen etxean, Lizeoren aurka. Koldoren golak erabaki zuen partidua, lehenengo zatiko 35garren minutuan. Bestalde, Kadeteen Ohorezko mailak 3-0ekoa lortu zuen, astigartarren alde, Lehengokoaken kontra. Gainerako taldeek ez zuten zorte bera izan, eta estreinaldiko partiduak galdu edo berdindu egin zituzten. Jubenilen Lehenengo Mailako mutilek 3-2ko markagailuarekin itxi zuten partidua, Lizeoren alde.
Asteburu gazi-gozoa, hernaniarrentzat
Emakumezkoek Euskal Ligak 2-1 galdu zuen Lakuan, Ainhoa Lizaso usurbildarraren golarekin. Emakumezkoen Ohorezko Erregional taldeak Beti Gazterekin neurtu zituen indarrak, eta 0-1 galdu zuen etxean. Gizonezkoen txapelketetan, Jubenilen Liga Nazionalak ez zuen lortu garaipena liderraren aurka, 1-4 itxi baitzen markagailua Zubipen, Realaren aurkako norgehiagokan. Hala ere, denak ez ziren porrotak izan. Gizonezkoen Erregional Ohorezko Mailak 0-0 berdindu zuen Touringen kontra eta Gorengoen Mailak ere 1-1eko berdinketa izan zuen asteburuko derbian, Urnietan.