Tratu Onen Foroa antolatu dute gaur arratsalderako, Biterin, Hernaniko Udalak, Arremanitz kooperatibak eta Berdintasun Kontseiluak. Sukalde gelan izango da, 17:30etan hasita; eta parte hartzeko, aldez aurretik eman behar da izena, emailez idatzita, hernanitoherri@gmail.com helbide elektronikora.
Oraingoan, zaintzaren gaia jarriko dute mahai gainean: Eta ni? Zaintzak erdigunera, norberarena ere bai. «Ondo egotea batere erraza ez den garaietan bizi gara, baita baldintza duin samarrak izanda ere. Pandemia garaia baino lehenago ere, gutako askok emozioen kudeaketan trebatzen jarraitzeko beharra bagenuen. Izan ere, zer sentitzen ari garen jakitea konplexua izan daiteke. Eta batzuetan, emozio horri nola erantzun jakiteko galdu xamar aurkitzen gara, nondik hasi jakin gabe», diote.
Horregatik, gaurko foroan proposatu nahi dute abiapuntu bat, «inspiratzeko edota kokatzeko lagungarri izan daitekeena. Gure beharrei arreta jartzen laguntzeko tresna bat sortu dugu, eta horrekin esperimentatzeaz gain, elkarrekin pentsatu eta elkar entzunez ikasteko aukera aproposa izan daiteke». Izan ere, «elkar zaintzearen garrantzia» azpimarratu dute; eta horretarako, komeni dela presente izatea «norberak zein behar dituen».