Iñigo Legorburu gailendu da Bizitza den xake taula zortzi orriko luzera duen lanarekin Oiongo Udalak antolatzen duen ipuin lehiaketan, euskeraz eta helduen mailan. Egilearentzat «niretzat ez-ohiko lana, normalean motzago idaztera ohitua nagoelako. Baina banuen zer idatzi eta ohi baino pixka bat gehiago luzatu naiz».
Xakea eta borroka psikologikoa du hizpide lan honek, izan ere egilearen hitzetan «nire 7 urteko semea gabonetatik hona xakean hasi denetik serio xamar eta konstantziaz, bere eskutik niretzako orain arte ezezaguna zen mundu bat deskubritzeko parada izan dudalako». Ezezaguna eta sorpresaz betea egilearentzat orain arte, «xakearen munduak baduelako zerbait engantxatzen zaituena, tartean; oso joko psikologikoa dela non pertsonaren izaera taularen gainean azaleratzen den sarritan… onerako edo txarrerako!».
Oiongo lehiaketa «nahikoa xumea da berez baina mimo haundiarekin antolatzen zutela esan zidaten bertan saritutako batzuk eta ondorioz, parte hartzera animatu nintzen». Eta baita saria lortu ere, lehen postua zehazki euskerazko eta helduen kategorian. Sari modura, 120 euro eta diploma lortu ditu egileak.