Inauteririk ez da izango aurten, baina ez dute ospakizunik gabe geratu nahi izan, Hernaniko Gaztelekuan. Horregatik, Mozorro Eguna ospatuko dute, arratsaldeko 16:30etatik 20:30etara; eta superheroiz mozorrotuko dira, hezitzaileak zein gazteak. «Horretarako, pentsatuko ditugu bakoitzak dauzkan indargune eta ezaugarri bereizgarrienak, eta horiek botere bihurtuko ditugu», aurreratu dute. Hezitzaileetako batek, esaterako, Super Nerea entzule izateko prestatu du mozorroa.
Gaztelekura gerturatzen diren gazteei, lagundu egingo diete horren inguruko hausnarketa egiten. Eta kasko inalambrikoak zozketatuko dituzte, mozorrotzen direnen artean: mozorrotuta joan daitezke, edota mozorroa bertan egin eta jantzi.
Helburua izango da, «umorearen eta dibertsioaren bitartez», tarte atsegin bat pasatzea, modu seguru batean. Izan ere, gogorarazi dute protokolo berezia ezarri dutela, Covid-19a dela eta. Aldi berean, 13 gazte egon ahal izango dira Gaztelekuan, ez gehiago.