Euskal presoak gerturatzeko bidean, beste pauso bat iragarri du Espainiako Espetxeetako Zuzendaritzak, egun hauetan. Beste bost preso gerturatuko ditu, eta horietako bat da Beinat Aginagalde preso hernaniarra.
Zehazki, Jaengo (Andaluzia) espetxea utziko du Aginagaldek, eta Palentziara mugituko dute, Dueñasko espetxera (Gaztela eta Leon). Horrela, Hernanitik 760 kilometro ingurura egotetik, 300 kilometro ingurura egotera pasako da, aldaketarekin.
2015ean ezarri zioten 32 urteko kartzela zigorra Aginagalderi, 2008ko martxoan Isaias Carrasco Arrasateko PSE-EEko zinegotzia erailtzea leporatuta. 2014an, proba faltagatik absolbitu zuen Auzitegi Gorenak, baina epaiketa errepikatzea erabaki zuen, akusazioaren lekukotza bat arrazoirik gabe atzera bota zelako; eta errudun deklaratu zuen orduan. 2017 urtean, berriz, 44 urteko kartzela zigorra ezarri zioten, Inazio Uria enpresariaren erailketan parte hartzea leporatuta.
Aginagalderekin batera, beste lau preso gerturatuko dituzte: Iñaki Arakama, Iñaki Armendariz eta Roberto Lebrero, Arabako Zaballako espetxera; eta Jose Maria Novoa, Leongora.