Gazte bat atxilotu zuten Hernanin, ostegunean, indakeria erabiliz lapurreta egitea leporatuta. Bezperan izan zen lapurreta, asteazkenean, herriguneko etxebizitza batean: adineko emakume bat igogailuan zegoela, gaztea hurbildu egin zitzaion, lepokoa lapurtu zion indarrez, eta ihes egin zuen.
Salaketa jasota, eta emandako informazioa baliatuz, ustezko lapurreta identifikatu zuen Ertzaintzak, eta dispositibo bat jarri zuen martxan, egilea aurkitzeko. Antziola auzoan aurkitu zuten ertzainek, eta atxilotuta, ertzain etxera eraman zuten, polizia-eginbideak hasteko, Ertzaintzak jakinarazi duenez.
Beste hiru deliturengatik ere ikertuko dute egilea
Behin ustezko lapurra Ertzaintzaren egoitzan zegoela, agenteak konturatu ziren gazteak motxilan zeramazkiela hainbat gauza, beste hiru deliturekin erlazionatuta daudenak: hiru autotan egindako lapurretekin, hain zuzen ere. Hori horrela, delitu horiengatik ere ikertuko dute gaztea.
Polizia-eginbideak bukatuta, Donostiako Guardiako Epaitegira eraman zuten atxilotua, jakinarazi dutenez.