Txapelketako hamahirugarren jardunaldia bertan behera gelditu zen hernaniarrentzat. Laredoren aurka neurtu behar zituzten indarrak, igandean, baina jokatu gabe geratu ziren azkenean: Kantabriako araudiak bidaiatzea debekatuta, Laredotik atera ezinik geratu ziren. Hori horrela, partidua atzeratu zuten, eta «ahal den unean» jokatuko dute. Eta martxa ez galtzeko asmoz, bi orduko entrenamendua egin zuen Eusebio Lizarazuren taldeak, partiduaren ordez. Sake-biltzea eta lehen lerroko defentsa landu zuten bereziki.
Datorren asteburuan, egutegiaren arabera, Navarmutilak taldearen aurka jokatu behar zuten hernaniarrek, baina aurreratu egin zuten partidu hori, eta dagoeneko jokatuta daukate, Gabonen aurretik. Aldiz, jokatu gabe daukate aurreneko itzuliko partidua, Hernanin jokatu beharrekoa. Nafarren esku dago, partidu hori jokatzera etorri nahi duten, datorren asteburuan. Astean zehar erabakiko dute.