2021 urteari hasiera emateko asmotan, jadanik argitara atera da urte berriko kultur agenda. Urtarriletik maiatzera bitarteko ekintza, antzerki eta ikuskizun guztiak lotuta daudela adierazi dute antolatzaileek, «baina bizi dugun egoerak egun batetik bestera ekintzak moldatzea ekarri du, beraz bi hilabeteka argitaratuko dugu agenda. Hori horrela, urtarriletik otsailera bitartekoa atera dugu orain, hain justu».
Hilabetea indar berrituta hasteko, gaur Los asquerosos liburuari buruzko solasaldia eskainiko du, Amaia Garciak. Arratsaldeko 19:15etan hasiko da, Biterin. Doakoa da baina bertaratzeko gonbidapena lortu behar da.
Urtarrilarekin jarraituz antzerkia antolatu da larunbat honetarako. Laika antzerkia eskainiko da Xirriquiteula treatreren eskutik, eguerdiko 12:00etan. 4 urtetik gorakoentzako izango da, eta sarrerak 3 euro balio du. Zinema zikloa ere urtarrilean hasiko da, 21ean hain zuzen ere, eta otsailean jarraipena izango du.
Garbiñe Insausti hernaniarra eta Iñaki Salvadorren eskutik urtarrilaren 27an, musika kontzertuaz gozatzeko aukera izango dute herritarrek. Arratsaldeko 19:00etan hasiko da, Biterin. Sarrerak aurrez erosi behar dira, eta 7,5 euro balio du bakoitzak.
Kultura Arloak, webgunea
Webgune berria jarri du martxan Hernaniko Kultura Arloak: kultura.hernani.eus. Bertan, urte berrirako antolatuta dauden ekitaldiei buruzko informazioa dago, «zein ordutan egingo den, zein egunetan, zenbat balio duen sarrerak, argazkiak ere badaude... informazio ugari dago webgunean». Eta noski sarrerak eta gonbidapenak bertatik lortzeko aukera ere eskaintzen du.
Urtarrileko emanaldietarako sarrerak gaurtik erosi daitezke, webgunean goizeko 09:00etatik aurrera jarriko dira salgai, eta Biterira ere bertaratu daiteke.
Nogen, otsailaren 12 eta 13an
Nogen taldeak bi kontzertu eskainiko ditu otsailean. Hasiera batean, «kontzertu bakarra eskaintzeko asmoa zegoen», hala ere, sarrerak berehala agortu zirela ikusirik, otsailaren 12rako beste kontzertu bat antolatu dute. Sarrerak otsailaren 1ean jarriko dira salgai. Modu presentzialean erosi daitezke Biterin, edo online erosteko aukera ere badago, Hernaniko kultura webgune berrian: kultura.hernani.eus.
|
URTARRILA OTSAILA |