Portu auzokoek gabonetarako plangintza berezia egin zuten urtea amaitzeko. Lau egunetarako egitaraua prestatu zuten, hainbat irteera, emanaldi eta tailerrekin. Gainera, adin guztietarako dinamikak izan ziren eta, beraz, auzotar guztiek gozatu zuten gabon giroan. Hilaren 30ean hasi ziren kultura-ekintzekin, urtea amaitu baino egun bat lehenago, alegia. Andoni magoaren ikuskizuna izan zen, Elizatxo Ikastolako aterpean. Arratsaldeko 17:00etan hasita, Argentina eta Hernani artean bizi den magoaren emanaldia izan zuten umeek, eta aho zabalik utzi zituen guztiak magia trukoekin.
Urteari amaiera borobila emateko Santa Barbarara mendi buelta egin zuten abenduaren 31n. Umeek zein helduek mendiko botak jarri eta goiz pasa egin zuten, ermitara bisita eginda. Argitxo ere bisitatu zuten, eta hamaika desio eskatu zizkioten, 2021 urtea bikain hasteko. Horrez gain, txangotik bueltan, brindisa egin zuten auzoan, eta gabonetako saskia zozketatu zuten. Kopa altxata, urtea familian itxi zuten auzotarrek, barre-algaren artean. Eta, azkenik, arratsaldean, suzko traka bota zuten auzoko plazatik.
