Urteroko zitari jarraiki Bertsolatako emanaldiak izan ditugu azken asteotan Hernanin, Iraulio Panttalone bertso eskolak antolatuta eta Udalak lagunduta. Arrakastatsua izan da orain artekoa: bertso-trama, Kontzertu bat bertsotan emanaldia, Norbere eztarritik mahai-ingurua eta gaztetxoentzako bertso-saioa. Bada, dagoeneko sartu da azken txanpan aurtengo ekitaldi-sorta. Amaiera ezin hobea prestatu dute bertso eskolako kideek; punta-puntako bertsolarien jaialdia, hain zuzen ere. Unai Agirreren gaiei tiraka, Andoni Egaña, Alaia Martin, Aitor Mendiluze eta Onintza Enbeita ariko dira, urtarrilaren 6an arratsaldeko 18:30ean. Biterin izango da emanaldia eta sarrerak dagoeneko eskuragarri daude Biterin bertan eta hernanikobertsoeskola@gmail.com helbidean. Gehienez bi sarrera eros daitezke pertsonako.
Egin zaitez KronikaKide!