Nahiz eta 2021garren urteko urtarrilaren 2a izan, gaur Galarretan, 2020 urteko Binakakoaren Erremonte Txapelketako finala jokatuko da. 50garren edizioa da aurtengoa eta bertan protagonistak Urriza-Labaka eta Ansa II.a-Aizpuru III.a izango dira. Bi atzelariak azpeitiarrak, Ansa urnietarra eta Urriza iruindarra.
Ansa eta Aizpuru aurreko bost partiduak irabazita iritsi dira, baina hala ere urdinez jokatuko dute. Gorriz ariko dira Urriza eta Labaka. Azken hauek partidu bakarra galdu dute txapelketa guztian zehar eta hori ligaxkan gertatu zen Ansa eta Aizpururen aurka, hain zuzen ere. Azaroaren 28an gertatu zen eta 35-40 irabazi zuten urdinek. Beraien ligaxkako lehenengo partidua izan zen eta ezin hobeto ekin zioten binakakoari.
Orain ere, berdin amaitu nahi dute, garaipenarekin eta txapelarekin. Hala ere, ez da erraza izango aurrean erremontistarik hoberena egongo baita. Javier Urriza da gaur egungo banakakoaren txapelduna eta binakakoan ere bera da txapelaren defendatzailea. Pasa den urtean, Larrañagarekin batera lortu zuen bere laugarren txapela modalitate honetan. Gainera, finalisten artean bakarra da final haundi bat jokatu duena.
Ansa eta Aizpururentzat lehenengo finala da binakakoan eta Labakak ere aurten egin du debuta txapelketa honetan. Nahiz eta esperientzia gutxiagoko erremontistak izan, hirurak txapelketa borobila osatu dute.
Ansa eta Aizpuru ezin hobeto ari dira jokatzen eta beraien arteko ulermena ikaragarria da. Gainera Aizpuru sasoi betean dago. Atzelari bezala salto izugarria eman du eta txapelketako ezusteko nagusia izan da. Ansak badaramatza bizpahiru urte onenen artean, baina aurtengo binakakoan erakutsi du maila erregularrena. Bere doai nagusiei orain ari zaie zukua ateratzen. Ezin ahaztu, Labakak eman duen maila. Urriza oso ongi babestu du eta finalerdian esaterako Barrenetxearen pare, gutxienez, aritu zen.
Urrizak bosgarren txapela irabazten badu, Elizalde eta Ezkurrarekin berdinduko luke
Urrizak irabazten baldin badu palmaresean bost txapelekin jarriko litzateke eta bide batez Kike Elizalde eta Koteto Ezkurrarekin berdinduko luke. Patxi Zeberiok irabazi ditu txapela gehien, zazpi. Esan, Aizpuru III.aren aitak ere hiru txapela badituela aurretik.
Txapelketa nola joan den ikusita esan liteke Ansa eta Aizpuru direla faborito, baina aurkarien txapelketa ere oso ona izan da eta Urriza beti da Urriza. Asteazkenean egin zuten material aukeraketa eta bai batzuk eta bai besteak gustora geratu ziren.
Ansa urnietarraren hitzetan «partidu gogorra nahi dugu urdinek, ez dugu azkar amaitzea nahi». Horregatik ez dute material oso arina nahi, nahiz eta Urrizak ere nahiago dituen pelota ez oso biziak. Aurreneko partiduan Barrenetxea IV.a hernaniarrak jokatuko du.
PALMARESA
Urtea Txapeldunak
1943 Azpiroz-Iturain
1957 Irigoyen-Salsamendi III
1964 P. Lecumberri-Ugarte
1972 Ibero-Erro
1973 Raúl-Arizcuren
1974 Iriarte I-Ayerbe
1977 Pablo-A. Lecumberri
1978 Intxauspe-Ayerbe
1979 Iriarte I-Urteaga
1980 Iriarte I-Zestau I
1981 Aseginolaza I-Urteaga
1982 Raúl-Urteaga
1983 Ibero-Zestau I
1984 Gorriz-Mujika
1985 Matxin II-Urteaga
1986 Elizalde-Agerre
1987 Elizalde-Agerre
1988 Noain-Agerre
1989 Prat-Mujika II
1990 Elizalde-Aizpuru
1991 Intxaurburu-Agerre
1992 Elizalde-Eizagirre
1993 Arregi-Aizpuru
1994 Ezkurra-Eizagirre
1995 M. Lecumberri-Eizagirre
1996 Elizalde-Etxabe
1997 Altuna II-Etxabe
1998 Zeberio II-Aizpuru
1999 Ezkurra-Imaz
2000 Altuna II-Txikuri
2001 Zeberio II-Iriarte
2002 Altuna I-Eizagirre
2003 Zeberio II-Auzmendi
2004 Zeberio II-Urrutia
2005 Zeberio II-Auzmendi
2006 Ezkurra-San Miguel
2007 Urriza-Lizaso
2008 Urriza-San Miguel
2009 Zeberio II-Badiola
2010 Urriza-Etxeberria III
2011 Zeberio II-Ion
2012 Urriza-Barrenetxea IV
2013 Uterga-Ion
2014 Ezkurra-Ion
2015 Ezkurra-Endika
2016 Uterga-Endika
2017 Uterga-Etxeberria III
2018 Uterga-Azpiroz
2019 Urriza-Larrañaga