Atseden astea behar zuen honek, Hernaniko boleibol taldearentzat, Euskal Ligan. Izan ere, geldialdia daukate, Gabonetako oporraldia tarteko. Baina ez dira geldirik egongo hernaniarrak; are gehiago, Kantabriara joango dira bihar, Laredora, atzeratuta daukaten partidua jokatzera.
Laugarren jardunaldian jokatu behar zuten Laredok eta Hernanik, elkarren kontra; baina pandemia eta lurraldekako itxierak tarteko, ezin izan zuten jokatu. Horregatik, geldialdi hau aprobetxatuz, bi taldeek adostu dute bihar jokatzea, arratsaldeko 17:00etan hasita. Eta horrekin, eguneratuta izango dute partiduen egutegia, aurreneko itzulia eta urtea bukatzeko.
Sailkapeneko hirugarren tokian dago Hernani, zazpi partidutik lau irabazita; eta seigarrena da Laredo, baina lau partidu besterik ezin izan ditu jokatu: bi irabazi ditu, eta beste bi galdu.
Aurreko astean Sestaori irabazi ondoren, beste garaipen bat lortu nahi du Hernanik, urteari bukaera onena emateko, eta goiko postuetan ekiteko Euskal Ligaren bigarren itzuliari.