Larunbatean bukatu zuten Binakako Txapelketaren ligaxka, Galarretan. Eta aldaketa gutxi izan ziren sailkapenean, azkeneko jardunaldian: bere horretan mantendu dira, semifinaletako kanporaketak.
Horrela, aurrez aurre ariko dira, datorren larunbatean, Ansa II-Aizpuru III eta Juanenea-Larrañaga; eta Segurola-Barrenetxea IV eta Urriza-Labaka. Ligaxkako buru bukatu dute Ansak eta Aizpuruk, larunbatean Goikoetxea V eta Endika menderatu ondoren (40-35). Eta hain justu, porrot horrengatik geratu dira kanpoan Goikoetxea eta Endika, eta sailkatu dira Juanenea eta Larrañaga, laugarren.
Larunbateko beste partiduan, aldiz, ezer gutxi zegoen jokoan. Liderren garaipenarekin, bazekiten bi bikoteek, semifinaletan elkarren kontra aritu beharko zutela. Edonola ere, partidu gogorra jokatu zuten. Barrenetxea izan zen nagusi hasieran, bere sakeari esker; eta horrela, alde haundia hartu zuten markagailuan (10-18 eta 13-31). Baina partidua erabakita zegoela zirudienean, buelta eman zioten Urrizak eta Labakak, eta 36, 37, 38 eta 39na berdindu ondoren, garaipena lortu zuten azkenean (39-40). Horrekin, aurrea hartu zieten ligaxkako sailkapenean ere.