Kontrakantxa Gaztetxeak 14 urte bete ditu aurten, eta egitarau zabala antolatu du urteurrena ospatzeko. Hori horrela, hiru ekintza prestatu dituzte gaurko egunerako. Izan ere, gaur da plangintzako azken eguna eta, beraz, berezia egin nahi izan dute.
Goizean goizetik hasiko dira ospakizunean. Santa Barbaran izango da topaketa, eskalada goiza izango baita 10:00etatik aurrera. Gero, bazkaria egingo dute gaztetxean, 14:00etatik aurrera. Eta, azkenik, eguna ezin hobe bukatzeko, kontzertuak izango dira 18:00etan. Nahia Vallek eta Nicolás Alvearrek jarriko diote giroa arratsaldeari, eta Espartzu taldeak emango dio amaiera urteurrenari.