Etxetik kanpo, baina Landaretik gertu agurtuko du urtea Hernani Errugbi Elkarteak. Zarautzen jokatuko dute trikoloreek, urteko azkeneko partidua, Ohorezko B Mailakoa. Gaur izango da hori, arratsaldeko 16:00etan hasita, Asti zelaian; eta Zarautz izango dute aurrean. Partidua ikustera joaterik izango ez duten arren, zuzenean ikusi ahal izango dute zaleek, internet bidez: Zarautz Rugby Taldeak YouTuben daukan kanalean eskainiko dute.
Aurreneko urte erdia gogorra izan zen, eta modurik onenean agurtu nahi dute hernaniarrek, Ohorezko B Mailako lidertza sendotuta. Orain arte, jokatutako bost partiduak irabazi dituzte, denetan erasoko bonusa eskuratuta, gainera. Horietan, 51 entsaio pilatu dituzte, eta sei besterik ez dituzte jaso kontra.
Zarautz, berriz, zazpigarren postuan dago, bi partidu irabazi eta hiru galduta. Hortaz, trikoloreak izango dira faborito, gaurkoan ere garaipena lortzeko, eta garaipenen plenoa mantentzeko. Edozein kontrario izan daiteke arriskutsua, dena den.
Gaurko partiduaren ondoren, bi asteburutan hartuko dute atseden, eta urtarrilaren 9an izango dira bueltan.