Hernaniko Udaleko Berdintasun Kontseiluak, urteak daramazki oroimen historikoaren berreskurapen lanetan; «zehazki, Hernaniko emakumeen inguruko historia jaso, landu eta herritarren esku jartzeko asmoz».
Hori horrela, Hernaniko Udalak eta Berdintasun Arloak, Empar Pineda Erdozia: Gorputzak hala eskatuta liburua argitaratu berri dute. Kattalin Miner izan da idazlea, eta Maddi Zumalabe ilustratzailea.
Hernaniarrari buruzko argitalpen hau, Pinedaren «ahotsetik» kontatutako istorioa dela azaldu du Minerrek: «elkarrizketa moduan egin nuen, Emparren esaldiak bere horretan jarri nahi nituelako, indar haundikoak baitira».
Atzo egin zuten liburuaren aurkezpena, Leokako labaderoan, «betidanik izan baita emakumeon txokoa».
Kattalin Minerrek, Bartzelonan egin zion elkarrizketa Empar Pinedari: «bere etxean hartu ninduen, eta zinez eskuzabala izan zen elkarrizketan». Pinedak urte luzetan jasandakoak azaldu zizkion idazleari: «frankismo garaian bizitakoa, borroka komunista, abortuari buruzko hainbat pasarte...».
Era berean, Kattalin Minerrek azpimarratu du, Pinedak argi utzi ziola bere bizitza ez zitzaiola apartekoa iruditzen; «gorputzak eskatu diona egin duela, besterik ez».
Liburua jadanik eskuragai dago, Plaza Feministan zein Elkar liburu dendan.