Beste urte batez, herriko hainbat elkartek bat egin dute, eta Hernani Solidarioa jardunaldiak antolatu dituzte, datozen egunetarako. Gaur bertan hasiko dira, eta datorren astean bukatu, abenduaren 19an.
«Helburua da, herrian solidaritatea eta kooperazioa sustatzea, eta balioan jartzea pertsona solidarioek orokorrean, eta migranteek zehazki, Hernaniko gizarteari egin dioten ekarpena», nabarmendu dute. Zehazki, bi egun seinalaturen bueltan antolatu dituzte jardunaldiak: Giza Eskubideen Adierazpen Unibertsalaren Eguna da gaur, eta Pertsona Migranteen Nazioarteko Eguna abenduaren 18a. Horregatik, azaleratu nahi dituzte Giza Eskubideen urraketak ematen diren egoerak, baina baita elkartasuna agerian geratu den egoerak ere.
Plaza Berrin emango diete hasiera jardunaldiei, gaur arratsaldean: panelak jarriko dituzte, salatzeko Hernaniko herritar askok etxebizitzarekin daukaten arazoa, bereziki migranteek. Eta era berean, zenbait esperientziaren berri emango dute, solidaritatearen isla direnak.
Esperientzia horien artean dago, hernaniarrek pandemiaren hasieran martxan jarri zuten Fondo Solidarioa, laguntzeko lana galdu zuten herritarrei, oinarrizko beharrak betetzeko baliabiderik izan ez, eta laguntza publikoak jasotzeko aukerarik ere ez zutenei: «diru-bilketa kanpaina jarri zuten martxan, eta herritarren eskuzabaltasunari esker gauzatu ahal izan zen».
Bihar izango da jardunaldien bigarren saioa: collage tailerra egingo dute, Giza Eskubideei eta pertsona migranteei buruz, goizeko 11:00etan hasita.
'Techo y comida' pelikula eta solasaldia, astelehenean
Datorren astelehenean izango dute segida jardunaldiek, Techo y comida pelikularekin. Biterin jarriko dute, 19:00etan; eta solasaldia ere egingo dute ondoren, etxebizitza arazoei buruz, Stop Desahucioseko kideekin.
Abenduaren 18an, berriz, paseoa antolatuko dute Amherreko boluntarioek. Eta hilaren 19an emango diete bukaera jardunaldiei: mural bat egingo dute, Hernaniko Gaztelekuko nerabeekin.
«Ikusarazi nahi dugu, Hernanin pertsona eta elkarte askok egiten dutela lan egunero, adiskidetasunezko elkarbizitza indartu eta solidaritate sareak ehuntzeko», adierazi dute jardunaldien antolatzaileek.