Egitarau zabaleko Bertsolata antolatu du aurten, Iraulio Panttalone Bertso Kabiyak. Zazpi zita jarri dituzte guztira, eta larunbat honetan izango da aurrenekoa: Bertso-tramarekin emango diote hasiera.
Bertso-trama hori, Eider Rodriguez idazleak sortu eta gidatuko du, eta hiru bertsolari ariko dira kantuan: Maialen Lujanbio, Unai Iturriaga eta Nerea Ibarzabal.
Milagrosako kaperan izango da, eguerdiko 12:00etan hasita. Eta saioaz gozatzeko sarrerak, dagoeneko eskuragarri daude, 5 euroan. Biterin erosi daitezke, edo emailez erreserbatu, Bertso Kabiyaren helbide elektronikora idatzita: hernanikobertsoeskola@gmail.com. Gehienez ere, bi sarrera eskuratu ahal izango ditu, pertsona bakoitzak.
Hurrengo hitzordua, abenduaren 19an izango da, hori ere larunbatarekin: Kontzertu bat bertsotan emanaldia eskainiko dute Manex eta Eli Pagola anai-arreba ereñotzuarrek, arratsaldeko 18:30etan Milagrosan. Bertso musikatuak diskoa argitaratu zuten urrian, elkarrekin, Eliren bertsoei Manexek musika jarrita; eta Ereñotzun eskaini zuten aurreneko kontzertua, azaroaren 7an, diskoa aurkezteko. Bigarrena izango da, Milagrosan eskainiko dutena. Horretarako sarrerak, larunbat honetatik aurrera egongo dira salgai, 3 euroan.