Aurreko sarien poza ahaztu ez, eta dagoeneko eskuratu du beste sari bat, Iñigo Legorburu hernaniarrak: Amarako Bertso-Paper Lehiaketaren hirugarren edizioa irabazi du.
Larunbat goizean eman zituen aditzera, Amarako Auzo Elkarteak, aurtengo lehiaketaren sarituen izenak. Eta joan den urtean bigarren izan ondoren, sari nagusia lortu du Legorburuk, oraingoan. Zortzi bertsoko sorta aurkeztu zuen hernaniarrak, Erromintzelez izenburuarekin; eta Xabier Silveiraren ETAren su-etenetik doinuan idatzita. «Bertsoetan, jaso ditut irakasle batek esango lizkiokeenak, ezkontzera dijoala eta eskola utziko duen ijito kastako ikasle gazte bati», azaldu du Iñigo Legorburuk berak.
Aurreneko sariarekin, txapela jaso du Legorburuk, eta baita bi bono ere: batetik, Kaxilda liburutegi eta jatetxean bazkaldu edo afaltzeko bi lagunentzako bonoa; eta bestetik, Kaxildan bertan erabiltzeko 100 euroko bonoa. Berez, Euskeraren Eguna ospatzeko ekitaldi batean egin behar zuten sari banaketa, Easo plazan; baina bertan behera geratu zen ekitaldia, eguraldi txarragatik. Horren ordez, sari banaketa inprobisatu egin behar izan zuten, Kaxilda liburutegiaren aurrean. Eta sariak jaso ondoren, eskertza bertsoa bota zuen Iñaki Goñi amararrak, bigarren saria lortu zuenak.
Bere kasu «berezia» nabarmendu nahi izan du Legorburuk: «irakaskuntzatik jubilatu ondoren, Amaran osatu eta Beñat Gaztelumendik gidatzen duen bertso eskolan eman zuen izena, orain dela ez asko. Oso talde anitza eta adin-tarte ezberdinetakoa osatu dute Amaran, Donostian bertsozaletasuna sustatzen ari den seinale», azaldu du hernaniarrak.
Mundu zoroa bertso sortarekin lortu du bigarren saria Iñaki Goñik; Xabier Amurizaren Itsaso hori dago zatarra doinuan idatzitako sei bertso. Munduko ajeak eman ditu aditzera horietan, modu kritikoan: boterea, haundinahikeria, dirua... Berak ere, bi lagunentzako otordua eskuratu zuen, Kaxildan.
Sarituen bertso sorta, ikusgai dago Amarako Auzo Elkartearen webgunean: amarakojaiak.blogspot.com. Hauxe da, Legorbururen bertsoetan aurrenekoa:
Yaiza, ijito kastako
neska ederra zara zu
ta orain zure aurrean
azterketa bat daukazu.
Tentsioa aurpegian
txertaturik daramazu
baina gaindituko duzu;
arren egidazu kasu!
Nire mirespen osoa
lortu duzu, pausuz pausu
ikaslea zaren arren,
ta ni berriz zure maisu
ikasgairik ederrena
zerorrek eman didazu.