Joan den larunbatean ekin zioten zortearen erruletari, Udaleko arkupeetan. #IzanAktibista kanpaina berpizteko abian jarri duten dinamika da, eta azaroko hiru larunbatetan egongo da, herritarrei sariak banatzeko. Erruletaren helburua da merkataritza jarduera bultzatzea eta herritarren kontsumoa sustatzea, eta horretarako sortu dute zortearen erruletaren ekimena.
Goizeko 10:00etatik 13:00etara izango da parte hartzeko aukera, baina joan den asteburuan berehala agortu ziren sariak. Beraz, azkar eta adi egotea gomendatu dute arduradunek. Izan ere, aurreko larunbatean bertaratu zen herritarren batek saririk gabe geratu behar izan zuen.
Tirada egiteko, baldintza bat
Parte hartzeko baldintza bakarra dago: aste honetako ostegun, ostiral edo larunbatean, Hernaniko dendetan erosketak egitea, 60 euroko gastuarekin, gutxienez. Beraz, erruletan tirada egiteko beharrezkoa izango da aldez aurretik erosketen tiketa erakustea. Aurrekoaren harira, tiket bat baino gehiago batu daitezke, aipatutako kopurura ailegatzeko.
Azken txanda datorren larunbatean izango da, azaroaren 28an. Antolatzaileek jakitera eman zutenez, guztira 100 sari banatuko dituzte erruletan. Tartean daude diskoak eta bestelako opari bereziak.