Gasteizen jokatuko dute txuri-berdeek bihar, Aurrera de Vitoriaren kontra

Ainhoa Lizaso txuri-berdea, Zubipen, aurreko denboraldiko partidu batean.

Euskal Ligako bigarren partidua izango du Hernanik, 12:00etan Olaranbe zelaian, aurreko bi asteburuetan atseden hartu ondoren. 

Bihar eguerdian jokatuko du Hernanik, Euskal Ligako bigarren partidua; eta etxetik kanpo ariko da berriro. Gasteizen izango da, 12:00etan hasita Olaranbe zelaian, eta Aurrera de Vitoria B taldearen kontra jokatuko dute txuri-berdeek.

Atseden hartzea tokatu zaie hernaniarrei, aurreko bi jardunaldietan. Izan ere, aurtengo denboraldi arraroan, astebururo bi taldek hartuko dute atsedena, zortzi taldeko multzoan; eta bi atseden jardunaldiak segidan egokitu zaizkie txuri-berdeei, ia martxan jartzeko astirik gabe. Orain arteko partidu bakarra, Lezaman jokatu zuten, Athletic C taldearen kontra, eta 10-1 galdu zuten orduan. Erreferentzia errealagoa izango da biharkoa, kontrario parekatuagoa izango baitute Aurrera talde arabarra. Orain arte, hiru partidu jokatu dituzte gasteiztarrek: bat irabazi, eta beste biak galdu dituzte. Hiru punturekin bueltatu nahi dute hernaniarrek, aurreneko partidua ahaztu eta konfiantza hartzen hasteko.