Kultur agendaren baitan, literatura solasaldia izango da bihar, modu birtualean. Arratsaldeko 19:00etatik aurrera Itxaro Bordak Zure hatzaren ez galtzeko poesia liburua aurkeztuko du. Saioa aurrez aurre egitekoa zen, Udal Liburutegian. Hala ere, arduradunek jakitera eman dutenez, idazleak ezinezkoa izango du liburutegira bertaratzea, konfinatuta dagoelako. Beraz, «teknologiaz baliatuko gara berarekin liburuari buruz hitz egin ahal izateko», adierazi dute.
Mintzagai izango duten poesia liburua Itxaro Bordaren poemario landu eta aberatsa da, bere azken urteetako bizi-esperientziak zein esperientzia estetikoak biltzen dituena. Testuaren atzean ezkutatzen dira idazlearen bidaiak, irakurketak, maitasuna eta konpromisoak. Liburua da Bordaren barnera eta mundura egindako begirada zintzo bat, egilearen hizkera poetiko berezian ematen dena.
Azaroan eta abenduan ere saioak izango dira
Datozen astetarako ere literatura solasaldiak antolatu dituzte, kultur agendaren barruan. Hurrengoa asteazkenean izango da, azaroaren 18an. Manuel Rivasen Las llamadas perdidas liburua izango dute mintzagai, eta Amaia Garcia izango da saioaren gidaria. Biteri kultur etxean izango da eta aforoa mugatua denez, aldez aurretik eman behar da izena.
Abenduan bi literatura saio izango dira: Eneko Aizpuruaren Lehertu da festa liburua hilak 15ean, eta Vivian Gornicken Apegos feroces, abenduaren 16an.