Hernani Errotzenek antolatuta, ostegun honetan Iñaki Lopez de Luzuriagak, itzultzaile eta Euskal Wikilarien Elkarteko batzordekideak, hitzaldia emango du Biteri kultur etxean. Saioaren izenburua hauxe da: Zer egin dezakegu euskaldunok Interneten? Wikipediako eta Wikimediako proiektuek eskaintzen dituzten aukerez eta premiez ariko da saioan. Funtsean, digitalizazioaren eta kulturaren garrantzia azpimarratuko du hitzaldian.
Mintzagai izango ditu historia, ondarea eta aisialdia. «Batez ere, hizkuntza berrerabiltzeko, bizkortzeko eta biziberritzeko gailuen garrantziaz ariko da», azaldu dute Hernani Errotzeneko kideek. Horiez gain, gailuen konfigurazioko hizkuntza aukerak ere landuko ditu. Eta hitzaldiarekin amaitzeko, Wikimedia Commons eta Wikidata -datu base askea- tresnak zer diren azalduko du hizlariak. Hortaz, hori guztia landuko du López de Luzuriagak osteguneko saioan.
Aipatu moduan, Euskal Wikilarien Elkartea sortu zuen duela 4 urte, eta orduztik buru-belarri aritu da horretan lanean. «Sakabanatuta» zeuden wikilariak elkartzeko asmoz sortu zuen elkartea, eta Wikipedian ordezkaritza bat sortu zuten, euskerari dagozkion kontuetan koordinatzeko helburuarekin.
Plazak mugatuak dira
Antolatu diren gainerako ekitaldien eta hitzaldien moduan, osteguneko saioan aforoa mugatua izango da. Kasu honetan, ordea, ez da aldez aurretik izena eman behar. Izan ere, jakitera eman dutenez, eserleku guztiak betetzen badira sarrera itxi beharko dute. Esan bezala, Biteriko areto nagusian izango da, arratsaldeko 19:00etan. Hernani Errotzenek jakinarazi du segurtasun neurri guztiak bermatuko direla, eta gogorarazi du nahitaezkoa dela maskarillaren erabilera.