Bi azoka jarriko dituzte gaur, Hernanin; eta biak egongo dira, goizean hasi eta eguerdira bitartean: Behemendiko azoka, eta bigarren eskuko azoka.
Plaza Berrin jarriko du azoka Behemendik, goizeko 09:00etatik 14:00etara; eta makina bat ekoizeleren produktuak izango dira bertan: Zabaloenea baserria, Goiburu pateak, Aparola baserria, Landarbaso, Mahala eta Mañeko. Horrela, denetik izango da azokan, aukeran: fruta, pateak, babarrunak, gaztak, landare eta loreak, jogurtak, txerrikiak, pastel eta tartak...
Bigarren eskuko azoka, berriz, Urbieta kalean jarriko dute, eguraldi ona aprobetxatuz. Goizeko 10:00etan jarriko dituzte aurreneko postuak, eta eguerdiko 13:30ak arte egongo dira zabalik, bigarren eskuko mota guztietako produktuekin. Dena den, oraingoan, Hernaniko eta ondoko herrietako postuak jarriko dituzte bertan, Eusko Jaurlaritzak hartutako azkeneko neurriak direla eta.