Saria jaso berri du Naroa Saenz de Heredia Milletek, Hernaniko Institutuko ikasleak, Argazki Geologikoen Lehiaketan. Zientzia Asteko ekimenen barruan antolatzen da sariketa, Bilbon; eta 12garren edizioa izan du aurtengoa. Hirugarren sari hori, ez da Saenz de Herediak lortu duen aurrenekoa: joan den urtean, aurreneko saria jaso zuen, berak aurkeztutako argazkiak.
DBHko laugarren mailako ikaslea da Saenz de Heredia, eta Institutuan, Biologia eta Geologia mintegitik animatu zuten, Institutuko ikasle guztiak bezala, horrelako jardunaldietan eta lehiaketetan parte hartzera, «balorean jarri nahian arlo horrek daukan garrantzia, egungo gizartean».
Lehiaketa eta sari banaketa online, edizio berezian
Hernani Institutuak azaldu du, COVID-19aren eraginez, aurten ez dela posible izan modu presentzialean egitea, Zientziaren Asteko jardunaldiak eta argazki lehiaketa bera; eta online burutu direla, sari banaketa bezalaxe. «Horregatik, are eta meritu haundiagoa du, egoera honetan lortutako sariak», nabarmendu du Institutuak: «Txalotzekoa da lortutako emaitza eta egindako esfortzua». Eta horregatik, ikaslea zoriondu nahi izan du, Hernani Institutuak.