Ohiko Feri Egunik ez, baina azoka berezi bat bai, izanen da Goizuetan, aurtengo azaroan ere. Mendialdeko Azoka eginen dute gaur goizean, 10:30etan hasi eta 14:00ak arte, eskualdeko nekazari eta artisauen postuekin. Oso anitza izanen da eskaintza: barazkiak, zeramika, eztia, gazta, bertako garagardoa, bitxiak, joareak, ukenduak...
Azokaren helburua da, «bertako ekoizeleen salmenta sustatzea, egoera zail honetan». Goizuetako Udalak, herriko eragileek, Cederna Garalurrek eta Plazaolak antolatu dute, elkarlanean; eta gonbitea luzatu diete herritar guztiei, bertaratzeko: «orain inoiz baino gehiago, beharrezkoa da bertan bertakoa kontsumitu, eta herriko ekoizleei salmenta zuzenerako bidea ematea», adierazi dute.
Zentzu horretan, antolakuntza taldearen lana nabarmendu nahi izan du Udalak: «ahalegin berezia egiten ari dira, segurtasun neurri guztiak betetzeko».
Izan ere, modu berezian prestatu dute azokaren eremua, COVID-19aren aurrean segurtasuna mantentzeko. Horretarako, zirkuitu bat prestatu dute, norabide bakarrekoa izanen dena, eta eremuko aforoa ere kontrolatu eginen dute. Era berean, gel hidroalkoholikoa ere paratuko dute sarreran, musukoa derrigorrezkoa izanen da, eta distantzia tarteak gorde beharko dira, jakinarazi dutenez.